Arrangement, kompetanseheving og nettverksbygging – Regionale kulturfond Møre og Romsdal

Møre og Romsdal fylkeskommune inviterer eit breitt spekter av aktørar til å søke støtte til arrangement, kompetanseheving og nettverksbygging. Prosjekta skal bidra til eit opent, inkluderande og mangfaldig kulturliv i heile fylket.

I 2025 er ramma for ordninga 1,5 mill. kroner.

Denne tilskotsordninga er finansiert over statsbudsjettet og ordninga regionale kulturfond. Formålet med desse midlane er at dei skal ...

... bidra til gode lokalsamfunn og eit ope, inkluderande og mangfaldig kulturliv i hele landet. Tilskotsmidlane skal stimulere til auka aktivitet og deltaking i kulturlivet, styrke samspel mellom profesjonelt og frivillig kulturliv, forsterke lokal og regional kulturfrivilligheit og bidra til auka kvalitet på kunst- og kulturtilbodet lokalt og regionalt.

Frå «Forskrift om Regionale kulturfond».

I denne ordninga kan du søke om midlar til å leie inn profesjonelle kunstnarar og/eller andre personar med relevant kompetanse. Du kan søke om støtte til kurs- og kompetanseheving, nettverk og kulturarrangement. Formålet er å stimulere til auka aktivitet og deltaking i kulturlivet. Med denne ordninga vil vi styrke samspel mellom profesjonelt og frivillig kulturliv og forsterke lokal og regional kulturfrivilligheit.

Det du skriv i dette skjemaet blir lagra automatisk når du trykker på knappen [Neste].

For å vere på den sikre sida er det likevel lurt å lagre litt undervegs – kanskje oftere enn du tenker er nødvendig.

Har det gått 20 minutt uten aktivitet? Da kan utfyllinga av skjemaet ditt gå tapt om det ikkje er lagra. Hugs derfor å lagre undervegs! Du finn knappen [Lagre] i midta nedst til venstre.

• Arrangørar av offentlege arrangement som skal nå eit bredt publikum
• Kommunar som arrangør eller tilretteleggar for samarbeid
• Kunst- og kulturinstitusjonar
• Profesjonelle kunstnarar og kunstnarfellesskap
• Små verksemder innan kulturell og kreativ næring*
• Frivillige lag og foreiningar og paraplyorganisasjonar med ein tydeleg kunst-, kultur og/eller kulturmiljøprofil
  

* Bransjane som er inkludert i næringa er:
Arkitektur, aviser og magasiner, reklame og event, TV og radio, musikk, film, dataspill, utøvende virksomhet (teater, dans, opera, orkester), visuell virksomhet (design, kunst, museum og kulturarv) og utdanning og undervisning innenfor næringen.

Kjelde: Anne-Britt Gran og Bjørn Eirik Olsen (red), «Kreativ Næring. Lokale, digitale og økonomiske perspektiver», Universitetsforlaget, 2021

Søkar har ansvar for å planlegge, organisere og gjennomføre arrangementet. Søkar må vere registrert i Enhetsregisteret og ha si hovudverksemd i Møre og Romsdal.

1. Støtte for innleige av profesjonelle aktørar innan kunst, kultur og kulturmiljø som skal bidra i lokale eller regionale arrangement.

Dette kan inkludere:
a. Lønn, honorar og/eller reisekostnader
b. Leige av lokalar for øving, produksjon eller visning i samband med konkrete arrangement eller tiltak
c. Logistikk, grafisk materiell og anna marknadsføring samt andre reelle kostnader knytt til gjennomføringa av arrangementet

2. Kompetanse- og nettverksutvikling:
Støtte kan bli gitt til tiltak som bidreg til kompetanseheving, nettverksbygging og etablering av møteplassar innan kunst, kultur og kulturmiljø. Tiltaka skal bidra til å bygge opp både kunnskap og kapasitet, og kan gjerne skje i samarbeid mellom fleire aktørar. Målet er å styrke kulturlivet gjennom samarbeid på tvers av fag, uttrykk og profesjonar.

Dette kan for eksempel vere:

• kurs, seminar, workshops og instruksjon retta mot frivillige og/eller profesjonelle aktørar.
• å legge til rette for etablering av nettverk og faste møteplassar kor profesjonelle og/eller frivillige kulturaktørar kan møtast, dele erfaringar eller koordinere og planlegge samarbeid.

Det blir ikkje gitt støtte til tiltak eller arrangement som har blitt gjennomført før søknadsfristen. De får ikkje støtte når dato for gjennomføring er under 6 veker etter søknadsfrist.

Det blir ikkje gitt tilskot til drift av faste og allereie etablerte nettverk og møteplassar.

1. oktober 2025 kl. 23.59

Under føresetnad av vidare tildeling til regionale kulturfond over statsbudsjettet, har ordninga tre søknadsfristar frå og med 2026: 1. februar, 1. mai og 1. september.

• Ein profesjonell aktør må ha utdanning innan f.eks. kulturmiljø, kunst- og kulturfag, samfunnsfag eller annan kompetanse relevant for oppdraget. Realkompetanse og profesjonell verksemd kan erstatte utdanning.
• Profesjonelle aktørar som blir leid inn skal behandlast likt og få lønn i samsvar med bransjestandard. Eksempel på slike standardar er Norsk skuespillerforbund, Norske dansekunstnere, Dramatikerforbundet, Regiforbundet og Creo.
• Godtgjering for reise, diett og eventuell overnatting skal skje etter Statens regulativ.

For å fremme tilgjengelegheit og inkludering oppfordrar vi alle søkarar til å bruke prinsippa om universell utforming. Da kan tiltak vere tilgjengelege for alle deltakarar uavhengig av fysiske eller kognitive føresetnadar.

Alle søknader vert vurdert etter desse tre kriteria:

1. Relevans
Relevans samanlikna med utlysinga: Er søknaden med på å oppfylle målet med ordninga?

 2. Effekt og verdiskaping

• Verdiskaping: Arrangementet skal bidra verdiskaping lokalt og/eller regionalt, for eksempel ved å treffe eit bredt publikum eller nye publikumsgrupper, skape nye kulturtilbod, legge til rette for nye samarbeid eller møteplassar.
• Kommunikasjon og kompetansedeling: Kunne vise til korleis tiltaket og resultat skal bli formidla til relevante målgrupper. Dette kan vere for eksempel kulturfeltet, næringsliv, lokalsamfunn og/eller offentlege aktørar.

3. Gjennomføring

• Framdriftsplan: Det skal komme tydeleg fram korleis tiltaket skal drivast framover.
• Budsjett: Ei realistisk oversikt over inntekter og utgifter knytt til tiltaket eller arrangementet.
  

Kulturavdelinga i Møre og Romsdal fylkeskommune vil saksbehandle søknaden din utan ugrunna opphald. Vanlegvis vil du ha fått svar frå oss innan fire til seks veker etter søknadsfrist. Etter at søknaden er behandla vil du få svar på søknaden din skriftleg.

I tildelingsbrevet finn du opplysningar om tildelt sum og kva vilkår som må vere oppfylte før du kan få støtta utbetalt.

At tildelinga er gitt på vilkår betyr at du må følge opp og gjennomføre punkta som står nedanfor. Vi vil kontrollere at vilkåra er følgt.

Vanlegvis utbetalast 75 prosent av tilskotet ved tildeling og resten etter at rapporten og prosjektrekneskapet er levert.

1. Du må sei ifrå om endringar

Prosjektet eller tiltaket må gjennomførast slik det er søkt om og i tråd med grunngivinga i vedtaket. Viss det er nødvendig å gjere endringar må du avklare det med fylkeskommunen på førehand. Støtta frå fylkeskommunen kan maksimalt utgjere 50 prosent av det totale budsjettet. Viss tiltaket ikkje gjennomførast som planlagt, eller kostnadene blir lågare enn budsjettert, kan støtta bli redusert.

2. Du må rapportere og føre rekneskap

Rapporten skal gjere greie for gjennomføringa av tiltaket i forhold til søknaden. Rekneskapen skal vise korleis støtta er brukt og settast opp slik at det kan samanliknast med budsjettet du sendte i søknaden. Støtta frå fylkeskommunen skal spesifiserast i rekneskapen.

Rapporten skal innehalde namn på aktør(ar) som vart brukt, kort beskriving av arrangementet og tal på deltakarar/publikum. Det må leggast ved program, plakat, omtale, bilde eller anna som viser at tiltaket er gjennomført. I rekneskapen skal honorar for kvar enkelt aktør vere synleggjort.

For tildelingar under 500 000 kroner skal sluttrekneskapen vere kontrollert og signert av nokon som ikkje har vore med i føringa av rekneskapen. For tildelingar over 500 000 kroner, skal det leggast fram rekneskap godkjent av autorisert revisor.

3. Du må få sluttrapporteringa godkjent for å få utbetalt siste del av støtta

For å få utbetalt dei siste 25 prosentane av tildelinga di, må du sende inn sluttrapport. Når saksbehandlar har godkjent rapporten din, blir det gjenståande beløpet betalt ut. Du må sende rapport innan fristen som du finn i tildelingsbrevet.

Har du ikkje rapportert, og på den måte bedt om å få den siste delen av støtta di utbetalt, vil den falle vekk etter to år.

Rapport og rekneskap skal sendes elektronisk via fylkeskommunen sitt nettbaserte rapporteringsskjema. Rapporteringsskjema finn du via denne lenka: https://dialog.mrfylke.no/dialogue/

4. Du må synleggjere støtta du får

Støtta frå fylkeskommunen skal synleggjerast ved marknadsføring. Det skal òg komme fram i årsmelding og eigen post i rekneskapen at det er mottatt tilskot frå Møre og Romsdal fylkeskommune.

Har du gitt ufullstendige eller feilaktige opplysingar i søknaden din, kan vi krevje at du må betale tilbake heile, eller delar av, støtta. Dersom vi ved ein feil utbetaler for mykje, skal det som er utbetalt for mykje betalast tilbake.

Ved hjelp av rapporten du leverer vil vi kontrollere at vilkåra er følgt, og du må gi alle nødvendige opplysingar for at fylkeskommunen kan gjennomføre denne sjekken. I tillegg vil det bli gjort tilfeldige utvida stikkontrollar blant dei som har fått støtte i ordninga.

Dersom det er utbetalt tilskot i strid med den nasjonale forskrifta, eller tilskotet ikkje
er utbetalt eller brukt i samsvar med føresetnadane for tildelinga, kan
fylkeskommunen krevje heile eller delar av tilskotet tilbake.

Vedtak i tilskotssaker er eit enkeltvedtak ifølge forvaltningslova § 28. Det betyr at du kan klage innan tre veker frå den datoen du fekk brevet.

Om du sender inn ei klage, vil kulturavdelinga gjere ei ny vurdering i saka. Dersom ikkje vedtaket blir omgjort, blir klaga sendt til fylkeskommunen si klagenemnd for behandling. Det må påreknast saksbehandlingstid.

Klaga og eventuell dokumentasjon kan sendast digitalt via e-Dialog, som du finn gjennom denne lenka: https://svarut.ks.no/edialog/mottaker/944183779

Kulturtilskot er ei moglegheit for støtte til gode prosjekt, men er ikkje ein rett. Tildelinga skjer ut frå fastsette retningslinjer, krav og prioriteringar, som er opne og tilgjengelege for alle.

Tilskotsmidlane er avgrensa, og det kjem ofte fleire søknadar enn det er midlar til. Derfor vurderer fylkeskommunen søknadane etter ei heilskapleg skjønnsutøving. Sjølv søknadar som oppfyller alle krava, kan få avslag eller ein lågare sum enn søkt beløp.

For å kunne gi tilskot, må vi ha nok midlar i budsjettet.