Masterstipend

Kvart år gir fylkeskommunen stipend til masteroppgåver som bidreg til kunnskapsutvikling og kompetanseheving om aktuelle problemstillingar i Møre og Romsdal. Har oppgåva di eit hovudtema innanfor kultur, kompetanse, næring og berekraft? Da kan du søke om eit stipend på 25 000 kroner.

Med bakgrunn i oppgåvearbeidet og funn du gjer, ønsker vi at du som student bidreg med råd og innspel til korleis fylkeskommunen kan arbeide for å skape best mogleg vilkår for innbyggarane i fylket vårt.

Alle som får masterstipend frå oss, må presentere oppgåva si for fylkeskommunen når den er ferdig. Presentasjonen skjer på Teams og det er som oftast avdelinga som jobbar innan fagområdet du har skrive om som deltek.

Masteroppgåva må bli levert våren 2025.

Masterstipendordninga er delt inn etter fagområde – kultur, kompetanse, næring og berekraft. Det er utvalde tema for kvart område. Du finn ei oversikt over aktuelle tema lenger nede på sida.

Nokre krav gjeld alle fagområda:

• Masteroppgåva skal belyse ei aktuell problemstilling i Møre og Romsdal
• Minst ei av einingane i undersøkinga skal vere lokalisert i Møre og Romsdal

Stipenda er delte inn i fagområde. Kvart fagområde har eigne aktuelle tema og desse blir rullerte årleg. Nokre av fagområda har spesifikke tema, andre er meir opne.

Ta òg gjerne ein titt på oversikta over tidlegare stipendmottakarar, tema og oppgåver som du finn på mrfylke.no.

KULTUR

Å arbeide for eit levande kulturliv i fylket er ei viktig oppgåve for Møre og Romsdal fylkeskommune. Vi ønsker at innbyggarane skal få oppleve kunst og kultur i nærmiljøet sitt. Dette gjeld særleg barn, ungdom og seniorar.

I Møre og Romsdal brukar vi eit utvida kulturomgrep og har derfor også ansvar for frivilligheit, folkehelse, idrett og friluftsliv i fylket vårt.

Aktuelle tema

• idrett
• folkehelse
• frivillig sektor
• kunst- og kulturformidling
• kulturarv
• kulturelle og kreative næringar
• likestilling og universell utforming av kulturtilbod
• spillteknologi og digital formidling av kultur

Antal stipend
Inntil 4 stipend

Kontaktperson
Sunniva Nerbøvik Løkhaug

KOMPETANSE OG NÆRING

Fylkeskommunen har det overordna ansvaret for kompetansepolitikk i fylket. Det betyr at fylkeskommunen skal samordne innsatsar frå ulike delar av samfunns- og arbeidslivet for å skape best mogleg samsvar mellom kompetansebehova til samfunnet og utdannings- og opplæringstilboda som blir tilbydd i regionen. Ei sentral oppgåve innan kompetansepolitikken er å utvikle og drifte den vidaregåande opplæringa for ungdom og vaksne.

På næringsområdet har fylkeskommunen ansvar for å stimulere til attraktivitet og nyskaping i arbeids- og næringslivet.

I juni 2024 vart Grønt industriløft Møre og Romsdal lansert, ei analyse av moglegheitene til fylket knytt til omstillinga til ein berekraftig grøn økonomi. Ei masteroppgåve innan næringsområdet skal bruke analysen som ein vesentleg del av kjeldematerialet, og føre fram praktisk retta tilrådingar som svarar ut behova analysen har avdekka.

I løpet av hausten 2024 lanserer OECD ein rapport om moglegheitene for utvikling av ein sirkulær økonomi i Møre og Romsdal. Vi oppmuntrar å ta i bruk også denne rapporten der tida tillèt det.

Aktuelle tema på kompetanseområdet

• kunnskap om kompetansebehov i arbeidslivet for utvikling av utdanningstilbod
• etter- og vidareutdanning i arbeidslivet
• arbeidslivsrelevans i utdanningane
• eit meir inkluderande arbeidsliv
• overgangar frå ungdomsskole til vidaregåande opplæring
• overgangar frå vidaregåande opplæring til høgare utdanning

Aktuelle tema på næringsområdet – i lys av Grønt industriløft Møre og Romsdal

Satsingsområde for grønt industriløft

• grøn maritim næring
• biomarin næring
• sirkulære hubar

Barrierar for grønt industriløft

• tilgang til fornybar kraft
• kapital
• kompetanse
• areal

Antal stipend
Inntil 4 stipend

Kontaktperson
Øyvind Tveten

BEREKRAFTIG SAMFUNNSUTVIKLING

Fylkeskommunen er pådrivar for regionale samarbeid for å løyse komplekse samfunnsutfordringar.

Aktuelle tema

• innovasjon og systemendringar i møte med komplekse samfunnsutfordringar
• sirkulærøkonomi i Møre og Romsdal på tvers av sektorar (jf. anbefalingane som kjem i OECD kartlegging av sirkularitet i Møre og Romsdal – lanserast i september 2024)
• førebygging av ungt utanforskap
• frå nasjonalt samfunnsoppdrag til lokal handling; inkludering av fleire barn og unge i utdanning, arbeids- og samfunnsliv
• omstilling i offentleg sektor
• innbyggardialog om framtidas offentlege tenestetilbod

Antal stipend
Inntil 2 stipend

Kontaktperson
Oddny Wiggen

• Fylkesstrategi for kultur, frivillig sektor og arenaer 2022–2025
• Fylkesstrategi for kvalitet i vidaregåande opplæring 2023–2027
• Fylkesstrategi for forsking og innovasjon 2021–2024

Alle desse finn du på våre nettsider mrfylke.no.