Prosjektstøtte til kulturmiljø og friluftsliv

Har du eit prosjekt innan kulturminne, kulturmiljø og friluftsliv i Møre og Romsdal? Da kan du søke støtte i denne ordninga. Målet med ordninga er å bevare og formidle regionale kulturminne og kulturmiljø av regional verdi og legge til rette for at folk kan drive friluftslivsaktivitetar i nærleiken av der dei bur.

Denne ordninga var ny i 2024 og er slått saman av desse to ordningane:

• Tilskot til skjøtsel, skilting, merking og mindre friluftstiltak
• Tilskot til regionale til kulturminne og kulturmiljø

Desse ordningane er altså avvikla og erstatta av den nye ordninga.

Les meir om ordninga på mrfylke.no.

Fylkeskommunen gir tilskot til tiltak innan kulturmiljø og friluftsliv i samsvar med formålet med ordninga. Dette kan for eksempel vere:

• Skjøtsel og tilrettelegging av friluftsområde.
• Rydding og opparbeiding av turstiar
• Klopping og gangbruer
• Skilting og merking av friluftsområde og turstiar
• Tiltak som medverkar til istandsetting og bevaring av kulturmiljø, alle typar byggverk, hagar, parker, historiske ferdselsårer, steingjerde, bruer og liknande. Det kan vere til planlegging, gjennomføring og dokumentasjon.
• Å arrangere kurs eller seminar som støtter formålet med ordninga

Les dei fullstendige retningslinjene for prosjektstøtte til kulturmiljø og friluftsliv ved å følge denne lenka.

Når søknaden din gjeld kulturmiljø

Kulturmiljø må vere listeført i Regional delplan for kulturminne i Møre og Romsdal eller i kommunens kulturmiljøplan og/eller ha omsynssone kulturmiljø i reguleringsplan eller kommuneplanen sin arealdel.

Storleiken på tilskotet blir vurdert ut frå budsjett for kvart tiltak og tilgjengelege midlar.

Kva blir det ikkje gitt støtte til?

• Ordinær drift
• Friluftslivstiltak med totalkostnad høgare enn 150 000 kroner. Skal de søke om meir enn 150 000 kroner kan de søke om spelemidlar.
• Lause gjenstandar og immateriell kulturarv – ordninga gjeld faste kulturminne
• Tiltak som er gjennomført før søknadsfristen
• Tiltak som er meint å skape eit overskot for private aktørar
• Kostnadar knytt til deltakaravgift og reise til seminar, utdanning, studietur og liknande
• Innspeling og utgiving av litteratur, film eller musikk

Fylkeskommunalt tilskot til kulturmiljø og friluftsliv kan tildelast

• foreiningar/organisasjonar/sameige/frivillige
• private eigarar som enkeltpersonar eller private verksemder
• kommunar

Ordninga har som formål å

• bevare og formidle kulturmiljø av høg lokal og regional verdi. Med kulturmiljø
  forstår vi kulturminne, kulturmiljø og landskap.
• legge til rette for at folk kan drive friluftslivsaktivitetar i nærleiken av der dei bur
• gjere eksisterande kulturminne, stiar og turvegar meir kjent gjennom
  tilrettelegging

1. november kl. 23:59

Søknad må leverast elektronisk innan søknadsfristen. I tillegg må den innehalde:

• Budsjett med finansieringsplan (forventa inntekter og utgifter)
• Fyldig omtale av tiltaket (kva som skal gjerast, og korleis det skal gjerast)
• Oversikt over korleis kostnadene skal finansierast

Når søknaden gjeld kulturmiljø må du òg ha

• kartutsnitt der det aktuelle kulturminnet er merka
• kommune, adresse, gards- og bruksnummer der kulturminnet står (ev. Sefrak ID eller kulturminne ID)
• skildring og foto av kulturminnet (oversiktsbilde og detaljbilde) eller staden kor prosjektet eller tiltaket skal gjennomførast, innvendig og utvendig.
• tilstands- og tiltaksbeskriving av arbeidet frå restaureringskyndig handverkar og/eller rådgivar. Detaljert beskriving av materialbruk og byggemetode.
• spesifisert overslag over kostnader frå restaureringskyndig handverkar og/eller rådgivar

Når søknaden gjeld friluftsliv

• Kartutsnitt der det aktuelle området er merka
• Kommune, adresse, gards- og bruksnummer

Fylkeskommunen betaler ut støtta når du har sendt inn sluttrapport. Rapporten skal vise at prosjektet er gjennomført i tråd med grunngivinga og vilkåra i tildelingsbrevet.

Du kan be om utbetaling av inntil 75 prosent av støtta medan prosjektet er undervegs. For å få utbetalt dei siste 25 prosentane av tildelinga di, må du sende inn sluttrapport.

At tildelinga er gitt på vilkår betyr at du må følge opp og gjennomføre punkta som står nedanfor. Vi kan kontrollere om vilkåra er følgt.

Punkt 1, 2 og 3 gjeld kun for prosjektstøtte til kulturmiljø.

1. Du må følge dei antikvariske retningslinjene – for kulturmiljø

Vedlikehald og istandsetting av kulturmiljø skal skje skånsamt og etter antikvariske
retningslinjer. I korte trekk betyr det at:

• Du må reparere bygningsdelar framfor å skifte dei ut. Skift ut minst mogleg av originale element og materialar. Du skal heller legge til eit bygningselement eller materiale, enn å fjerne.
• Når du reparerer eller skiftar ut bygningsdelar, skal du bruke materiale av same kvalitet, dimensjon og utforming. I tillegg må også dei same teknikkane brukast.
• All tilbakeføring til eit tidlegare stadium i bygning eller anlegget si historie, skal skje på eit dokumentert grunnlag.

Har du spørsmål til punkta ovanfor, kan du ta kontakt med saksbehandlar. Du finn den
fullstendige antikvariske retningslinja ved å følge denne lenka.

2. Du har ansvar for at handverkarane har rett kompetanse – for kulturmiljø

Når tildelinga gjeld eit kulturminne, er du

• oppdragsgivar for handverkarane. Du må få bekrefta at dei utførande handverkarane har kompetanse innan praktisk bygningsvern. Det kan vere kurs, utdanning eller erfaring frå tidlegare prosjekter på verneverdige bygg og anlegg. Viss handverkarane ikkje har dette, må du engasjere ein bygningsvernhandverkar som følger opp dei utførande handverkarane.
• ansvarleg for at handverkarane er kjend med omtalen av tiltaket i søknaden, grunngivinga for vedtaket om tilskot og dei antikvariske retningslinjene.

Blir det aktuelt å engasjere andre utførande handverkarar enn det du har oppgitt i søknaden? Da må du kontakte fylkeskommunen på førehand og orientere om handverkarane sin kompetanse.

3. Du må dokumentere arbeidet
Når tildelinga gjeld kulturmiljø, har du ansvar for at arbeidet blir dokumentert gjennom foto og skildringar før, under og etter arbeidet er ferdig. Du kan òg avtale at handverkarane gjer dette. Bilda skal leverast inn som ein del av rapporteringa.

4. Du må seie ifrå om endringar

Tiltaket må gjennomførast slik det er søkt om og i tråd med grunngivinga i vedtaket. Viss det er nødvendig å gjere endringar må du avklare det med fylkeskommunen på førehand. Vi minner om at støtta frå fylkeskommunen maksimalt kan utgjere 50 prosent av det totale budsjettet. Viss tiltaket ikkje gjennomførast som planlagt, eller kostnadene blir lågare enn budsjettert, kan støtta bli redusert.

5. Du må rapportere og føre rekneskap

Rapporten skal blant anna gjere greie for korleis arbeidet er gjennomført, og kva for materiale som er brukt. Du må også rapportere på om arbeidet er gjort i tråd med dei antikvariske retningslinjene.

Rekneskapen skal vise korleis støtta er brukt og settast opp slik at det kan samanliknast med budsjettet du sendte i søknaden. Støtta frå fylkeskommunen skal spesifiserast i rekneskapen. Kopi av faktura og ei liste over dugnadstimar skal følge med rekneskapen som vedlegg.

For tildelingar under 350 000 kroner skal sluttrekneskapen vere kontrollert og signert av nokon som ikkje har vore med i føringa av rekneskapen. For tildelingar der støtta frå fylkeskommunen er over 350 000 kroner, skal det framleggas rekneskap godkjent av autorisert revisor.

Du skal sende inn sluttrapport og rekneskap seinast tre månader etter at prosjektet er ferdig. Om vilkåra for tildelinga ikkje blir følgt, kan vi krevje at du må betale tilbake heile, eller deler av, støtta.

6. Du må få sluttrapporteringa godkjent for å få utbetalt siste del av støtta

For å få utbetalt dei siste 25 prosentane av tildelinga di, må du sende inn sluttrapport. Når saksbehandlar har godkjent rapporten din, blir det gjenståande beløpet betalt ut.

Tilskotet er gyldig i året du får tilskotet og ut dei to påfølgande åra. Du må sende rapport seinast tre månader etter at prosjektet er ferdig og siste frist for sluttrapportering er 1. november det siste året tildelinga er gyldig. Har du ikkje sendt inn sluttrapportering innan fristen, vil den automatisk falle vekk etter to år.

Rapport og rekneskap skal sendes elektronisk via fylkeskommunen sitt nettbaserte rapporteringsskjema, seinast tre månader etter at prosjektet er ferdig. Rapporteringsskjema finn du via denne lenka: https://dialog.mrfylke.no/dialogue/

7. Du må synleggjere støtta du får
Støtta frå fylkeskommunen skal synleggjerast ved marknadsføring. Det skal òg komme fram i årsmelding og eigen post i rekneskapen at det er mottatt tilskot frå Møre og Romsdal fylkeskommune. Logoen til fylkeskommunen finn du ved å følge denne lenka.

Har du gitt ufullstendige eller feilaktige opplysingar i søknaden din, kan vi krevje at du må betale tilbake heile, eller delar av, støtta. Dersom vi ved ein feil utbetaler for mykje, skal det som er utbetalt for mykje betalast tilbake.

Ved hjelp av rapporten du leverer vil vi kontrollere at vilkåra er følgt, og du må gi alle nødvendige opplysingar for at fylkeskommunen kan gjennomføre denne sjekken. I tillegg vil det bli gjort tilfeldige utvida stikkontrollar blant dei som har fått støtte i ordninga.

Vedtak i tilskotssaker er eit enkeltvedtak ifølge forvaltningslova § 28. Det betyr at du kan klage innan tre veker frå den datoen du fekk brevet.

Om du sender inn ei klage, vil kulturavdelinga gjere ei ny vurdering i saka. Dersom ikkje vedtaket blir omgjort, blir klaga sendt til fylkeskommunen si klagenemnd for behandling. Det må påreknast saksbehandlingstid.

Klaga og eventuell dokumentasjon kan sendast digitalt via e-Dialog, som du finn gjennom denne lenka: https://svarut.ks.no/edialog/mottaker/944183779