Utviklingsstipend i tradisjonshandverk

Fylkeskommunen lyser ut to stipend på 50 000 kroner til enkeltpersonar som ønsker å heve kompetansen sin om tradisjonshandverk.

Stipendet skal skape stoltheit og merksemd om den sentrale rolla tradisjonsberande handverkarar har i å ta vare på kulturminne og føre vidare den immaterielle kulturarven i fylket til framtidas generasjonar.

1. april

Stipendet skal fremme utvikling i tradisjonshandverk innan bygningsvern og fartøyvern i Møre og Romsdal.

Berre enkeltpersonar kan søke.

Du kan vere ein profesjonell handverkar som arbeider med eller ønsker å fordjupe deg i tradisjonelle handverksfag innan bygnings- og fartøyvern.

Du må bu og arbeide i Møre og Romsdal.

Det er krav om at du har minimum fullført vidaregåande opplæring med fagbrev/sveinebrev, eller minst 5 års relevant arbeidserfaring.

Kompetansebygging av tradisjonshandverkarar i konkurranseutsette handverksbedrifter vil bli prioritert, men museumshandverkarar tilsett i regionmusea har også moglegheit til å søke.

Du kan søke om stipend til kompetansehevande aktivitetar slik som

• å fordjupe seg, prøve ut og dokumentere eldre handverksteknikkar, verktøymaking eller materialproduksjon
• å delta på kurs eller hospitere hos andre tradisjonshandverkarar

Stipendet kan dekke tapt arbeidsforteneste og utgifter knytt til aktiviteten.

Det blir ikkje gitt stipend til gjennomføring av offentleg godkjent utdanning som gir rett til studielån.

Vi prioriterer tradisjonshandverkarar som vil bruke stipendet i samanheng med arbeid på verneverdige bygningar eller fartøy.

I tillegg er det positivt om søkar

• er tidleg i karrieren
• har fagleg kompetanse og engasjement
• har dokumentert evne til å arbeide målretta over tid
• deler kunnskap og kompetanse med andre

Kulturavdelinga i Møre og Romsdal fylkeskommune vil saksbehandle søknaden din utan ugrunna opphald. Vanlegvis vil du ha fått svar frå oss innan fire til seks veker etter søknadsfrist. Etter at søknaden er behandla vil du få svar på søknaden din skriftleg.

I tildelingsbrevet finn du opplysningar om tildelt sum og kva vilkår som må vere oppfylte før du kan få støtta utbetalt.

Du må bruke stipendet i år

Du må bruke stipendet innen utgangen av året du søker om støtte frå oss.

Du må sei ifrå om endringar

Prosjektet eller tiltaket må gjennomførast slik det er søkt om. Viss det er nødvendig å gjere endringar må du avklare det med fylkeskommunen på forhånd. Viss tiltaket ikkje gjennomførast som planlagt, eller kostnadene blir lågare enn budsjettert, kan støtta bli redusert.

Du må levere rapport

Når du er ferdig må du sende inn ein rapport, seinest 1. desember. Rapporten kan vere skriftleg eller munnleg, for eksempel ein film eller ein presentasjon. I rapporten fortel du korleis du har brukt stipendet og kva du fant ut.