Kunstnarstipend

Profesjonelle kunstnarar som bur og har sitt virke i Møre og Romsdal kan søke kunstnarstipend.

Stipendet skal brukast til arbeid med konkrete kunstnariske prosjekt, fagleg fordjuping og utvikling. Det kan òg brukast til andre kostnadar knytt direkte til den skapande verksemda.

Søkar skal berre sende inn ein søknad. Alle søknadar blir vurdert til arbeidsstipend og mindre stipend.

Stipendet kan ikkje brukast til å finansiere oppstart av næringsverksemd eller til finansiering av studiar.

Søknadsfrist er 1. april kl. 13.00 kvart år. Søknadar som kjem etter fristen vil ikkje bli behandla.

Viss fristen er på ein heilagdag, blir fristen forlenga til kl. 13.00 første kvardag etter 1. april.

Møre og Romsdal fylkeskommune si ordning med kunstnarstipend skal:

• fremme kunstfagleg aktivitet av høg kvalitet hos kunstnarar som bur og har sitt virke i fylket
• stimulere til at kunstnarar etablerer seg i fylket
• gi kunstnarar moglegheit til å fordjupe seg over tid for å utvikle seg og heve den
  kunstnarlege kvaliteten på arbeidet sitt
• gi kunstnarane moglegheit til å arbeide med nyskapande utviklingsarbeid

1. Stipend kan søkast av profesjonelle kunstnarar som bur og har sitt virke i Møre og Romsdal.
2. Søkar må ha kunstnarisk verksemd som sitt hovudvirke.
3. Søkar må ha kunstfagleg utdanning på bachelornivå eller høgare eller kunne til vise til kunstfagleg realkompetanse og profesjonell verksemd.
4. Om du tidlegare har fått arbeidsstipend på 200 000 kroner frå Møre og Romsdal fylkeskommune skal det gå minst tre år før du vil bli vurdert for nytt arbeidsstipend.

Stipendet skal brukast til arbeid med konkrete kunstnariske prosjekt, fagleg fordjuping og utvikling. Det kan òg brukast til andre kostnadar knytt direkte til den skapande verksemda.

Kva kan stipendet ikkje brukast til?

• Finansiere oppstart av næringsverksemd
• Finansiering av studiar

Søknaden skal sendast elektronisk via søknadsskjema på fylkeskommunen sine nettsider. Vedlegg skal lastast opp i søknadsskjemaet. Alle vedlegg skal vere i PDF-format.

I søknadsskjemaet må du oppgi følgande:

• Kontaktinformasjon
• Kort skildring av kunstnarskapet der du i hovudsak viser til nyare aktivitet og
  prosjekt frå dei fem siste åra. Skildringa skal gi dei som vurderer søknaden ei forståing av kva du som søkar jobbar med.
• Skildring av kunstnariske planar og målsettingar, gjerne konkrete prosjekt. I tillegg skal du beskrive kva du ønsker å bruke stipendperioden til.
• CV på inntil 3 sider skal vere lasta opp i PDF. Den skal vise relevant kunstnarisk utdanning, kunstnarisk verksemd og produksjon og anna relevant informasjon.
  o Kommande aktivitet skal berre vere inkludert om den er bekrefta.
• Inntil 5 vedlegg kan leggast ved i tillegg til CV. Vedlegga må vere representative for kunstnarskapet og i hovudsak dokumentere nyare arbeid. Dokumentasjon skal vere i PDF slik at alle verk ligg i ei og same PDF-fil på maksimalt 12 sider.
  o Video- og lyddokumentasjon kan leggast ved som nettlenker (for eksempel Vimeo, YouTube, SoundCloud). Nettlenkene skal vise direkte til det aktuelle materialet.
  o Dersom påloggingsinformasjon er påkravd, må brukarnamn vere
  tilgjengeleg i minst 6 månadar etter søknadsfrist.
• Du må sende inn eit budsjett saman med søknaden

Kulturavdelinga er sekretariat for stipendet. Det blir innhenta kompetanse frå aktuelle faginstansar i vurdering av søknadene.

Søknadane innan visuell kunst skal leggast fram for ein eigen komité som blir sett saman av fagfolk frå kunstinstitusjonar og representantar frå kunstorganisasjonane Biletkunstnarane Møre og Romsdal og Norske Kunsthåndverkere Midt-Norge.

Kultur- og folkehelseutvalet fordeler stipenda etter innstilling frå dei ulike faginstansane.

•  75 % av stipendet blir utbetalt ved tildeling.
• Dei som får stipend må levere sluttrapport for sitt kunstnariske arbeid i stipendperioden. Dei resterande 25 % av stipendet blir utbetalt etter sluttrapport.
• Dersom det har blitt endringar i dei kunstnariske planane, skal dette kommenterast i sluttrapporten.
• Stipendperioden varer i eitt år frå tildeling. Stipendmottakarar må sende inn sluttrapport på bruk av stipendet innan 3 månadar etter stipendperioden.