Møremusikarordninga: Tilskot til innleige av profesjonelle frilansmusikarar

Kulturtilskot er eit gode du kan søke om å få, men ikkje noko du har krav på. Tildelinga skjer på bakgrunn av retningslinjer, krav og prioriteringar. Desse er gjort kjent på førehand.

Tilskotsmidlar er eit knappleiksgode. Det betyr at det er mindre pengar tilgjengeleg enn det som blir søkt om. Derfor gjer fylkeskommunen ei vurdering av søknadane basert på skjønn. Dette betyr også at gode søknadar, som er i tråd med retningslinjene, kan bli avslått eller få mindre støtte enn det de har søkt om.

Vi er avhengig av nok pengar i budsjettet for å kunne gjere tildelingar.

Arrangørar kan i denne ordninga få støtte til honorar og reisekostnader for profesjonelle musikarar.

Profesjonell kunst- og kulturformidling skal gi innbyggarane i fylket vårt eit relevant og mangfaldig kulturtilbod gjennom heile livet. Fylkeskommunen skal i samarbeid med andre legge til rette for gode rammevilkår for både kunstnarar, frivilligheita og aktørar i feltet.

Den årlege ramma er 1 000 000 kroner.

Det du skriv i dette skjemaet blir lagra automatisk når du trykker på knappen [Neste].

For å vere på den sikre sida er det likevel lurt å lagre litt undervegs – kanskje oftere enn du tenker er nødvendig.

Har det gått 20 minutt uten aktivitet? Da kan utfyllinga av skjemaet ditt gå tapt om det ikkje er lagra. Hugs derfor å lagre undervegs! Du finn knappen [Lagre] i midta nedst til venstre.

Tilskotsordninga skal bidra til å sikre gode profesjonelle musikktenester til kulturlivet og å legge til rette for kulturarrangement med høg kvalitet i Møre og Romsdal.

Ved å støtte dei profesjonelle musikarane sin kunstnarlege aktivitet legg også ordninga til rette for at fleire kan bu og leve av kunsten sin i fylket vårt.

Tilskotsordninga skal bidra til å nå måla i planverket til fylkeskommunen.

• Fylkesplan 2025–2028
• Fylkesstrategi for kultur, frivillig sektor og arenaer 2022–2025

• Konsertarrangørar
• Kulturinstitusjonar
• Det frivillige musikklivet
• Det lokale næringslivet

Arrangøren har ansvar for å planlegge, organisere og gjennomføre prosjektet. Dei har det overordna ansvaret for gjennomføringa av arrangementet. Det er denne arrangøren som skal sende inn søknaden.

Kven kan ikkje søke støtte?

• Kommunar inkludert kulturskolar
• Fylkeskommunen
• Undervisningsinstitusjonar
• Arrangørar av private arrangement
  

Som arrangør kan du søke om tilskot til honorar og reisekostnader til innleigde og
namngitte enkeltmusikarar som skal medverke i desse arrangementa:

• alle typar konsertar
• instruksjonsoppdrag
• akkompagnement
• arrangering og komponering i samband med konsertar
• assistansespel i amatørensemble
• profesjonelle ensemble
• kulturelle innslag ved f.eks. kurs, konferansar og møter, solistoppdrag, kursverksemd

Det blir ikkje gitt støtte til arrangement som har blitt gjennomført før søknadsfristen.
Arrangement får ikkje støtte når framføringsdato er under 4 veker etter søknadsfrist.

Oversikt over frilansmusikarar som bur i fylket finn du på våre nettsider.

Ordninga er open heile året og behandlast etter fem fristar:

15. januar, 15. mars, 15. mai, 15. august og 15. oktober

• Ein profesjonell musikar må ha kunstfagleg utdanning på bachelornivå eller høgare eller kunne vise til kunstfagleg realkompetanse og profesjonell verksemd.
• Tilskotet frå fylkeskommunen skal synleggjerast ved marknadsføring.
• Innleigde profesjonelle musikarar skal behandlast likt og lønnast etter bransjestandard. Arrangørane skal bruke Creo sine frilanssatsar eller nasjonale satsar for Den kulturelle skolesekken (DKS).
• Godtgjering for reise, diett og eventuell overnatting skal skje etter Statens regulativ.

For å fremme tilgjengelegheit og inkludering oppfordrar vi alle søkarar til å bruke prinsippa om universell utforming. Da kan prosjekt og tiltak vere tilgjengelege for alle deltakarar uavhengig av fysiske eller kognitive føresetnadar.

Søknad må leverast elektronisk, i dette søknadsskjemaet, i god tid før arrangementet skal gjennomførast. I tillegg må den innehalde:

• namn på arrangør, organisasjonsnummer og kontaktperson
• namn på arrangementet, stad og dato for gjennomføring (inkludert lokale og kommune)
• kort beskriving av arrangementet, innhald, plan for gjennomføring, målgruppe, forventa deltakarar, samarbeidspartar, program
• arrangementstype for eksempel ulike konsertar, assistansespel, instruksjon, seminar
• namn på kvar enkelt profesjonelle musikar du ønsker eller har avtalt å leige inn
• eventuelle amatørar som skal stå på scena saman med den eller dei profesjonelle musikaren eller musikarane
• budsjett som viser utgifter og inntekter. Musikarhonorar per musikar og forventa kostnader til reise må også komme fram
• framdriftsplan (tidsplan for tiltaket)

Søknadane blir vurdert og prioritert etter desse kriteria:

• Arrangement med profesjonelle musikarar som bur i fylket
• Arrangement der amatørar opptrer saman med profesjonelle musikarar på scena
• Frivillige lag og organisasjonar som treng profesjonelle musikarar for å heve kvaliteten på prosjektet
• Arrangement som medverkar til å nå måla i planverket til fylkeskommunen

For å sikre eit best mogleg mangfald av kulturarrangement i Møre og Romsdal, blir det gjennom året gjort ei heilskapleg vurdering av kva type arrangement og søkar som har fått støtte. Vi ser òg på kor arrangementa er gjennomført. I tillegg ser vi på om det er gjentakande søkarar på både denne og andre fylkeskommunale tilskotsordningar.

Ideelle og religiøse organisasjonar som søker om støtte skal likestillast.

Kulturavdelinga i Møre og Romsdal fylkeskommune har normalt fire veker saksbehandlingstid, frå første kvardag etter søknadsfrist. Etter at søknaden er behandla vil du få svar på søknaden din skriftleg.

I tildelingsbrevet finn du opplysningar om tildelt sum og kva vilkår som må vere oppfylte før du kan få støtta utbetalt.

Tildelinga kan maksimalt utgjere 50 prosent av det totale budsjettet. Dersom rapporten viser at den reviderte rekneskapen er lågare enn budsjettert, kan tilskotet bli avkorta.

Du må sei ifrå om endringar
Prosjektet eller tiltaket må gjennomførast slik det er søkt om. Viss det er nødvendig å gjere endringar må du avklare det med fylkeskommunen på forhånd. Viss tiltaket ikkje gjennomførast som planlagt, eller kostnadene blir lågare enn budsjettert, kan støtta bli redusert.

Du må rapportere og føre rekneskap for prosjektet

Rapporten skal gjere greie for gjennomføringa av tiltaket eller prosjektet i forhold til søknaden. Prosjektrekneskapen skal vise korleis støtta er brukt og settast opp slik at det kan samanliknast med budsjettet du sendte i søknaden. Støtta frå fylkeskommunen skal spesifiserast i prosjektrekneskapen.

Rapporten skal innehalde namn på musikar(ar) som vart brukt, kort beskriving av arrangementet og tal på deltakarar/publikum.

Det må leggast ved program, plakat, omtale, bilde eller anna som viser at prosjektet er gjennomført. I prosjektrekneskapen skal honorar for kvar enkelt musikar vere synleggjort.

For tildelingar under 350 000 kroner skal sluttrekneskapen vere kontrollert og signert av nokon som ikkje har vore med i føringa av rekneskapen. For tildelingar der samla støtte frå fylkeskommunen er over 350 000 kroner, skal det framleggas rekneskap godkjent av autorisert revisor.

Rapport og prosjektrekneskap skal sendes digitalt seinast tre månader etter at arrangementet er gjennomført.

Om vilkåra i brevet og rapporteringskrava ikkje blir følgt, blir støtta automatisk trekt tilbake etter to år.

Du må synleggjere støtta du får
Støtta frå fylkeskommunen skal synleggjerast ved marknadsføring. Det skal òg komme fram i årsmelding og eigen post i rekneskapen at det er mottatt tilskot frå Møre og Romsdal fylkeskommune. Logoen til fylkeskommunen finn du ved å følge denne lenka.

Vi kan krevje at du må betale tilbake støtta
Har du gitt ufullstendige eller feilaktige opplysingar i søknaden din, kan vi krevje at du må betale tilbake heile eller delar av støtta.

Dersom vi ved ein feil utbetaler for mykje, skal det som er utbetalt for mykje betalast tilbake.

Vi kan kontrollere korleis midlane er brukt
Vi kan kontrollere at tilskotet er brukt etter vilkåra. Viss du blir spurt, må du gi alle nødvendige opplysingar for at fylkeskommunen kan gjennomføre denne sjekken.

Vedtak i tilskotssaker er eit enkeltvedtak ifølge forvaltningslova § 28. Det betyr at du kan klage innan tre veker frå den datoen du får brev frå oss.